2026-njy ýylyň ýanwar aýynyň 15-ne Lebap welaýat raýat goranyş we halas ediş işleri müdirliginiň, Lebap welaýat Polisiýa müdirliginiň Ýangyn howpsuzlygy gullugynyň, Lebap welaýat Migrasiýa gullugynyň, Lebap welaýat Saglygy goraýyş müdirliginiň we Türkmenistanyň Gyzyl Ýarymaý Milli jemgyýetiniň Lebap welaýat bölüminiň bilelikde gurnamagynda Türkmenabat şäherinde ýerleşýän daşary ýurt dillerine ýöriteleşdirilen 39-njy orta mekdebiň mejlisler zalynda  çagalar baglarynda we orta mekdeplerde çagalara bilim-terbiýe berýän bilim işgärleriniň gatnaşmagynda “Adatdan daşary ýagdaýlara taýýarlyk görmek we olaryň töwekgelçiligini azaltmak boýunça sapaklary gurnap geçirmekde toplanan tejribeleri paýlaşmak” boýunça okuw maslahaty geçirildi. Okuw maslahatynda adamzat ýaşaýşynda ýüze çykyp biläýjek adatdan daşary ýagdaýlarda çagalaryň zerurlyklaryny, gender meselelerini we durmuş ýagdaýlaryny göz öňünde tutmak arkaly  kiçi ýaşly körpejeleriň we mekdep okuwçylaryň arasynda ýygy-ýygydan okuw sapaklaryny geçirmelidikleri, bu ugurda ýaş neslimiziň düşünjelerini baýlaşdyryp, habarly we taýýarlykly bolmagyny gazanmak babatynda jikme-jik nygtalyp geçildi. “Adatdan daşary ýagdaýlara taýýarlyk görmek we olaryň töwekgelçiligini azaltmak”, “Mekdepler üçin simulýasiýa treningleri geçirmek”, “Jemgyýet esasynda ilkinji lukmançylyk kömegini bermek we meýletinçiler, okuwçylar üçin epidemiýalara garşy göreşmek baradaky treningleri geçirmek”, şeýle-de “Bellenen sebitde howanyň üýtgemegine we tebigy betbagtçylyk töwekgelçiligine we gowşaklygyna baha bermek” boýunça mugallymlar we degişli gulluklaryň hünärmenleri tarapyndan geçirilýän amaly okuw sapaklarynyň netijesinde, her bir adatdan daşary ýagdaýlara taýýarlykly bolmak, özüňi we töweregiňdäki adamlary, galyberse-de tebigaty howpdan goramak mümkinçiliginiň netijeli boljakdygy bellenip geçildi. Degişli gulluklaryň hünärmenleriniň gyzykly we täsirli çykyşlaryndan soň ýaş neslimiziň arasynda geçiriljek açyk sapaklarda ulanmak üçin wideoroliklere tomaşa edildi we Gyzyl Ýarymaý Milli jemgyýetiniň welaýat bölüminiň hünärmeni tarapynda maglumat beriji neşir önümleri paýlandy. Köpçülikleýin ähli ulgamlar bolup garşysyna göreş alyp barmaklyga çagyrýan her bir hadysada olara täsir etmek üçin ýerli we milli mümkinçiliklerimizi güýçlendirmegiň  halkymyz, geljekki neslimiz we asuda ýaşaýyş üçin juda derwaýysdygy bellenilip geçildi.