Tomusky dynç alyş möwsüminiň  döwründe Türkmenistanyň Gyzyl Ýarymaý Milli Jemgyýetiniň Balkan welaýat bölümi ösüp gelýän ýaş nesliň diňe bir şadyýan däl, eýsem howpsuz dynç almagy barada hem alada edýär. Ýakynda şahamçanyň işgärleri «Awaza» milli syýahatçylyk zolagynda ýerleşýän «Dayanç» çagalar sagaldyş we dynç alyş merkezinde dynç alýan çagalar üçin peýdaly we gyzykly interaktiw sapagyny gurnadylar.

Duşuşygyň esasy temasy tomusky işjeň oýunlar wagtynda döräp biljek dürli şikeslenmelerde ilkinji kömegi bermegiň esasy endiklerini öwretmekden ybarat boldy.

Gyzyl Ýarymaý jemgyýetiniň hünärmenleri çagalara adatdan daşary ýagdaýlarda nähili dogry hereket etmelidigini düşnükli we gyzykly görnüşde gürrüň berdiler. Sapagyň maksatnamasy iň wajyp temalary öz içine aldy: Ýenjilmekde we siňir çekilmesinde ilkinji kömek: şikeslenen ýere sowuklygy nähili dogry goýmalydygy we ony nähili fiksirlemelidigi (gatamalydygy).

Ýaralary arassalamak we bejermek: gany duruzmagyň we iň ýönekeý sargylary daňmagyň howpsuz düzgünleri. Günüň we ýylylygyň urmagy: aşa gyzgynlygy wagtly-wagtynda nähili anyklamaly hem-de lukmanlar gelýänçä deň-duşlaryňa nähili kömek bermeli.Teoriýa bilimi şol bada tejribe bilen utgaşdyryldy. Çagalar uly höwes bilen halas edijileriň we şikes alanlaryň keşbine gerdiler: sargylary dogry daňmagy, elýeterli serişdelerden peýdalanmagy we iň esasy zat — gowgasyz, howsala düşmän gyssagly tiz kömek  çagyrmagy öwrendiler.

Guramaçylaryň bellemegine görä, şeýle sapaklaryň esasy maksady diňe bir gury görkezmeleri bermek däl, eýsem çagalarda öz güýjüne bolan ynamy, jogapkärçilik duýgusyny we kyn ýagdaýa düşenlere kömek etmäge taýýarlygy terbiýelemekdir. Balkan welaýat şahamçasynyň geçirýän şeýle çäreleri türkmen mekdep okuwçylarynyň tomusky dynç alyş gününi hakykatdan hem howpsuz we goragly etmäge ýardam berýär.