Türkmenistanyň Gyzyl Ýarymaý Milli jemgyýetiniň Daşoguz welaýat bölüminiň «Zehin» ýaşlar merkeziniň meýletinçileriniň arasynda adatdan daşary ýagdaýlarda özüňi dogry alyp barmak we özüňi dolandyrmak boýunça okuw-türgenleşik geçirildi. Okuw-türgenleşigiň dowamynda meýletinçilere adatdan daşary ýagdaýlar ýüze çykan wagtynda özüňi nähili alyp barmalydygy, howpsuzlyk düzgünlerini berjaý etmek we kyn ýagdaýlarda dogry çözgüt kabul etmek barada degişli düşünjeler berildi. Şeýle hem meýletinçilere çadyry dogry we howpsuz ýerde ýerleşdirip gurmagyň usullary görkezildi. Alnan nazary bilimleri berkitmek maksady bilen meýletinçiler toparlara bölünip, çadyrlary gysga wagtyň içinde dogry gurmak boýunça bäsleşik geçirdiler. Bäsleşigiň dowamynda gatnaşyjylar özleriniň çalasynlygyny, başarnygyny we toparlaýyn işlemek ukyplaryny görkezdiler. Geçirilen okuw-türgenleşik meýletinçiler üçin gyzykly we täsirli bolup, olaryň adatdan daşary ýagdaýlarda hereket etmek boýunça bilimlerini we amaly başarnyklaryny ýokarlandyrmaga ýardam berdi. Çäre meýletinçileriň arasynda uly gyzyklanma döredip, olarda ýakymly täsir galdyrdy.
