6-njy noýabrda Türkmenistanyň Prezidentiniň ýanyndaky Döwlet gullugy akademiýasynda döwlet gullukçylarynyň ýurdumyzyň syýasy ideologiýasynda jemgyýetçilik başlangyçlarynda we halkara guramalary bilen hyzmatdaşlykda öňe sürýän ynsanperwerlik ýörelgeleri barada Akademiýanyň Döwlet edaralarynyň gullukçylaryny gaýtadan taýýarlamak ugrunyň 1-nji we 2-nji ýylyk diňleýjileri bilen Gyzyl Ýarymaý Milli Jemgyýetiniň agzalarynyň “Täze eýýamyň Galkynyşy döwri – jebislik, agzybirlik we ynsan mertebesiniň dabaralanmagy” ady bilen duşuşyk geçirildi.

Duşuşykda Gyzyl Ýarymaý Milli Jemgyýetinden Guramaçylyk ösüşi bölüminden – Kümüş Tulekowa; Türkmenistanda meýletinçiligi ösdürmek taslamasynyň utgaşdyryjysy – Jemile Gawrilowa; Saglygy goraýyş we durmuş üpjünçilik bölüminden – Maýsa Ataýewa we Jennet Gulmyradowa; Halkara ynsanperwerlik hukugy we adatdan daşary ýagdaýlar bölüminden – Selbi Ýagşymyradowa; Maşgala gatnaşyklaryny dikeltmek gözleg gullugy bölüminden – Anastasiýa Belýaýewa dagylar çykyş edip bu guramanyň işleri bilen içgin tanyşdyrdylar. Hormatly Prezidentimiziň, Gahryman Arkadagymyzyň tagallalary bilen türkmeniň gadymdan gelýän milli ýörelgelerindäki haýyr-sahabat düşünjelerini halkara derejelerinde utgaşdyrýan bu guramanyň işgärleriniň çykyşlary dabara gatnaşýanlarda ýokary gyzyklanma döretdi. Esasan hem bu guramanyň ilkinji kömek boýunça okuwlaryna gatnaşmak isleýän we agzalygyna, meýletinçi toparlaryna goşulmak isleýän diňleýjileriň sany artdy.