3-nji dekabrda Daşoguz şäheriniň sport klubynda Halkara maýyplar güni mynasybetli sport ýaryşlary geçirildi. Bu ýaryşlar TGMJ-niň Daşoguz welaýat bölüminiň hünärmenleri we meýletinçileri tarapyndan mümkinçilikleri çäkli adamlar üçin gurnaldy.
Mälim bolşy ýaly, her bir ynsanyň, şol sanda mümkinçiligi çäkli adamlaryň durmuşynda sport ägirt uly orny eýeleýär. Ol saglygy berkitmegiň, fiziki we akyl taýdan kämilleşmegiň iň täsirli usulydyr. Şeýle-de sport bilen meşgullanmak, munuň özi jemgyýetçilik durmuşyna işjeň gatnaşmak we mümkinçiligi çäkli adamlar üçin hemmetaraplaýyn kämilleşmekdir.
Halkara derejesinde bellenilýän sene mynasybetli geçirilen sport çäresinde gatnaşyjylara höweslendirji sowgatlaryň gowşurylmagy we baýramçylyk dabarasynyň gurnalmagy bilen tamamlandy. Dabaranyň dowamynda Türkmenistanyň körler we kerler jemgyýetiniň wekilleri tarapyndan aýdym-sazly çykyşlar ýerine ýetirildi.
