Çäge terapiýasy - çagalaryň sagdyn ösüşiniň möhüm şerti: Daşoguz welaýatynyň Görogly etrabynyň çagalar bakja-bagynyň körpeleriniň arasynda geçirilen çäre

TGÝMJ-niň Daşoguz welaýat bölümi tarapyndan Görogly etrabynyň 2-nji çagalar bakja-bagynyň körpeleriniň arasynda art terapiýanyň bir görnüşi bolan çäge terapiýasy boýunça düşündiriş we amaly çäre geçirildi. Çäräniň dowamynda körpeler arassa, ýyly çägäniň üstünde dürli gyzykly oýunlary oýnap, wagtlaryny şadyýan geçirdiler. Şeýle hem çagalara çäge bilen oýnamagyň we tomus paslynda arassa çägäniň üstünde aýakýalaňaç gezmegiň saglyk üçin peýdalary barada ýaş aýratynlyklaryna laýyklykda düşündirişler berildi. Bellenilişi ýaly, çäge terapiýasy çagalaryň döredijilik ukyplaryny ösdürmäge, olaryň duýgularyny erkin beýan etmegine, beden hem-de ruhy taýdan sazlaşykly ösmegine ýardam berýär. Lukmanlar tarapyndan hem ösüp barýan çagalara çägede oýnamak maslahat berilýär, sebäbi bu olaryň bedeniniň berkemegine, immunitetiniň ýokarlanmagyna we umumy saglygynyň gowulanmagyna oňyn täsir edýär. Çäre körpeleriň işjeň gatnaşmagynda, şatlykly pursatlara beslenip geçirildi.