Bütindünýä Gyzyl Haç we Gyzyl Ýarymaýyň döredilmeginiň 163 ýyllygy mynasybetli Daşoguz welaýatynda “Ynsanperwerligiň beýany” atly sergi geçirildi.

Halkara Gyzyl Haç we Gyzyl Ýarymaý hereketiniň döredilmeginiň 163 ýyllygy mynasybetli Daşoguz welaýat taryhy we ülkäni öwreniş muzeýinde täsirli sergi guraldy. Bu çäre ynsanperwerligiň, rehimdarlygyň we birek-birege goldaw bermegiň beýik gymmatlyklaryny giňden wagyz etmek maksadyny özünde jemledi. Sergä Daşoguz welaýatynyň Alp-Arslan adyndaky ýöriteleşdirilen harby mekdebiniň talyplarynyň gatnaşmagy çärä aýratyn many-mazmun berdi. Ýaşlar serginiň dowamynda diňe bir maglumat almak bilen çäklenmän, eýsem ynsanperwerlik ýörelgeleriniň durmuşdaky ornuna çuňňur düşünmek mümkinçiligine eýe boldular. Çäräniň dowamynda Halkara Gyzyl Haç hereketiniň esas goýujysy Anri Dýunanyň ömri, onuň dünýä derejesindäki ynsanperwer başlangyçlary hem-de bu hereketiň döreýiş taryhy barada gyzykly gürrüňler edildi. Bu bolsa talyplaryň arasynda uly gyzyklanma döretdi. Sergi ýaş nesillerde rehimdarlyk, kömek bermäge taýýarlyk we jemgyýetçilik jogapkärçiligi ýaly gymmatlyklary ösdürmekde möhüm ädim boldy. Şeýle çäreler jemgyýetde ynsanperwerlik ýörelgeleriniň berkidilmegine uly goşant goşýar.