GDA döwletleriniň Gyzyl Haç we Gyzyl Ýarymaý Milli jemgyýetleriniň ýolbaşçylary Sankt-Peterburgda duşuşdylar

Türkmenistanyň Gyzyl Ýarymaý Milli jemgyýetiniň wekilleri Sankt-Peterburg şäherinde geçirilen GDA agza döwletleriň Gyzyl Haç we Gyzyl Ýarymaý Milli jemgyýetleriniň ýolbaşçylarynyň duşuşygyna gatnaşdylar. Tawrid köşgünde geçen halkara forum ynsanperwer guramalaryň ýolbaşçylaryny we hünärmenlerini sebitara hyzmatdaşlygy berkitmek, tejribe alyşmak we işiň ilkinji derejeli ugurlaryny kesgitlemek üçin bir ýere jemledi. Işjeň mejlisleriň dowamynda gatnaşyjylar adatdan daşary ýagdaýlara garşy çäre görmekde utgaşdyrmak, meýletinçilik hereketini ösdürmek, ynsanperwer maksatnamalara sanly tehnologiýalary ornaşdyrmak, şeýle hem saglygy goraýyş we ilaty durmuş taýdan goldamak meselelerini maslahatlaşdylar. Türkmenistanyň wekilýetiniň duşuşyga gatnaşmagy Milli jemgyýetiň GDA giňişliginde ynsanperwer gepleşikleri berkitmekdäki işjeň ornuny tassyklaýar we bilelikdäki wezipeleri netijeli çözmek üçin hyzmatdaşlygyny mundan beýläk-de giňeltmäge ýardam edýär.