Düzüminde müňlerçe agzalary, meýletinçileri bolan Gyzyl Ýarymaý Milli jemgyýet gaýragoýulmasyz meseleleri çözmäge işjeň gatnaşyp, döwletiň kömekçileri bolup durýar. Ilatyň arasynda amaly-okuw maslahatlary, wagyz-nesihat çäreleri yzygider gurnaýan Milli jemgyýet Baky Bitarap Türkmenistan döwletinde halkyň saglygyny goramakda, olara durmuş taýdan goldaw bermekde, ýaşlary milli däp-dessurlaryň ruhunda terbiýelemekde we ynsanperwerlik gymmatlyklary ýaýratmakda Hormatly Prezidentimiziň öňde goýan maksatnamalarynyň durmuşa geçirilmeginde saldamly goşant goşýar. 5-nji dekabr Halkara meýletinçiler güni bolup, ynsanperwer işlere höwes bilen ýardamçy bolýan meýletinçiler Milli jemgyýetiň Lebap welaýat bölüminde her ýyl baýramçylyk süýjülik saçagy bilen garşylanýar we olar ýadygärlik sowgatlar bilen höweslendirilýär. “Pähim-paýhas ummany-Magtymguly Pyragy” ýylynyň dekabr aýynyň 5-ne hem edil şeýle baýramçylyk güni bellenilip otuz sany meýletinçiniň gatnaşmagynda Halkara ynsanperwerlik hukugy, Ynsanperwerlik ýörelgeleri, Adatdan daşary ýagdaýlara taýýarlyk, Ekologiýa arassaçylygyny berkitmek we Lukmandan deslapky ilkinji kömek bermekligiň düzgünleri boýunça “Breýn-ring” bäsleşigini geçirildi. Baýramçylyk dabarasyna gatnaşan meýlerinçiler geljekki meýilnamalar  we  çäreler barada pikir alyşdylar. Dabaranyň soňunda işjeň meýletinçileriň ýigrimi bäş sanysyna  ýadygärlik sowgady paýlanyp berildi.