19-njy iýulda Türkmenbaşy şäheriniň portunda taktiki türgenleşikler geçirildi,muňa Türkmenbaşy şäheriniň ähli bölümleri we guramalary gatnaşdy. Türkmenistanyň Gyzyl Ýarymaý Milli jemgyýeti hem türgenleşige işjeň gatnaşdy.
Hazar deňzinde geçirilen türgenleşigiň ssenariýasy boýunça, tehnogen betbagtçylygyň netijesinde nebit önümleriniň dökülmegi ýüze çykdy, şondan soň duýduryş yglan edildi. Kenarda bir ýerden başga bir ýere göçürilen ýaralanlara Gyzyl Ýarymaýyň işgärleri duşdular, ilkinji lukmançylyk we psihologik kömek nokadyny gurnadylar.Bu ýerde ilkinji kömek enjamlary çadyryny we kürsüleri gurnadylar. Agyr ýaralalanlary tiz lukmançylyk kömeginiň lukmanlaryna gowşurdylar.
Şol wagt deňizde daşky gurşaw gözegçilik hyzmaty tarapyndan suwy zyýanly maddalar bilen hapalanandygyny barladylar. Gyzyl Ýarymaýyň meýletinçileri kenarda dynç alýanlaryň arasynda düşündirişli söhbetdeşlik geçirdiler, şol sebäpli hem wagtlaýynça suwa girmeklik maslahat berilmeýär. Türkmenbaşy şäherindäki Hazar deňziniň kenarynda bolup geçen adatdan daşary tehnogen hadysalaryň netijelerini ýok etmek üçin türgenleşikler ýokary guramaçylyk derejesinde geçirdiler, şäheriň ähli gulluklary öz gatnaşyklaryny we adatdan daşary ýagdaýlara taýýarlyklaryny görkezdiler.
